原创陈建兴海上梦叠
来源：夜光杯
作者：陈建兴
上海话改写：郭莉
沪语讲述：周月英
一个时代有一个时代个生活场景。因为童年辰光家庭生活拮据，留拨勒我交关个回忆，其中，伊眼勿会忘记脱个购物细节，现在回想起来，带了眼苦涩，倒也还有眼快乐个。
伊歇辰光，样样啥个商品侪要凭票供应，交关日用品侪是供勿应求，我爷娘日朝想个就是，哪能用顶少个铜钿去买顶实惠个物事。
“等外品”，是伊歇辰光勿少商店专门有柜台供应个一种相对便宜个商品，是产品质量虽然勿合格、但又并勿妨碍使用个物品。一般来讲，商店侪会挂出醒目个小黑板告示，所以顾客购买之前就晓得了迭个商品有点啥个缺陷。等外品价钿一般只有正品个六七折，甚至是对折个。
刚刚进中学辰光，学堂里组织阿拉出去野营拉练，每个人要自备一只水壶。我爷晓得曹家渡万航渡路口有爿旧货商店，里向有得军用水壶卖个，就带我去了。到了店里向，只看见墙壁浪向挂勒蛮多个军用水壶，水壶身浪向侪有大大小小个瘪塘。搿种水壶是铅质材料，软木塞，用帆布带从两边固定，外头搨了深绿色个油漆。因为有得瘪塘，就属于等外品了，只卖五角洋钿一只。看见搿能介个瘪塘，我勿大焐心，拉我爷到忻康里个百货商店去买新水壶。爷勿同意，两家头僵脱了一歇，伊借口讲身浪只有七八只角子，买新个钞票勿够。我呒没办法了，只好让伊买了只瘪塘水壶。野营拉练从学堂出发个辰光，我拿有瘪塘个一面朝里向背，一埭路里，从来呒没人注意到我用个是只等外品水壶。半个号头拉练下来，每个人个水壶浪侪是伤痕，有种甚至是大瘪塘连仔小瘪塘。迭个辰光，我真是庆幸啊，我买个等外品军用水壶是几化佮算呀。
淘等外品个事体，阿拉屋里是常庄做个。记得有一趟，姆妈陪我到长宁路一家百货商店买汗衫。我看见件自家欢喜个海魂衫，就缠牢仔姆妈要买。但是，姆妈看见勒柜台上头还挂了等外品个，只有海魂衫个一半价钿，不过呢，汗衫左胸搿搭有只小洞洞，伊就勿关三七廿一买下来了。我实在是勿焐心呀，借口汗衫有洞勿肯着，姆妈灵机一动，拿我戴勒身浪个像章别到汗衫浪，迭只小洞眼刚好拨盖牢了。姆妈买到便宜货，一面孔个开心，我心里实在是有眼发呴，只好耷头耷脑跟勒伊后头回转去了。阿拉屋里向个日用品，像面盆、搪瓷杯、钢种水铫（diao）子搭仔热水瓶壳子咾啥，爷娘买转来个侪是等外品。记得阿哥到崇明农场去，姆妈搭伊买了只印有“广阔天地、大有作为”个农村图案搪瓷面盆，边浪有块搪瓷敲脱了，当然是等外品了，姆妈一看，比正品要便宜一块多，迭个是伊勒生产组一日多个工钿呀，当然是毫勿犹豫个买下来了。阿哥让我到秀水路地摊浪用三分洋钿买转来一小包搪瓷白漆，伊拿砂皮拿碰脱搪瓷个地方砂一砂，揩清爽，再用手节头蘸了搪瓷漆均匀个搨上去，晾干之后，勿存心去看，还真个看勿大出补过个地方。阿哥个迭个修补技术我也学会了，伊到农场去了以后，屋里向假使有得搪瓷用品碰脱外头个搪瓷，侪是我来补好个。
姆妈欢喜淘“等外品”，除脱仔价钿便宜，更加多考虑个是可以少用票证，甚至勿收票证。有趟我跟伊到曹家渡大渡河绸布店买我个裤子料作，一进店门姆妈就看到了一块小黑板，上头写勒海“等外品成裤，免收布票”。姆妈老开心个，拿到裤子之后再看到有几个地方用粉笔划出来，是跳线脚个。伊皱了皱眉头，问清爽价钿之后就算起来了，真个是比买料作做裤子还要佮算。姆妈觉着自家是搨着大便宜了，马上要挖出钞票买下来，营业员提醒姆妈让我试试大小看，姆妈再想到迭个问题。我着好裤子，发现大了交关，但是姆妈仍旧买下来了。回转来之后，伊请对门老裁缝稍微改了改，就变成功一条邪气合身个裤子。跳线脚个地方叫我拿圆珠笔搨一搨，线脚就看大勿出了。姆妈欢喜淘等外品个习惯也传拨了我。年，我拨分到星火农场，当时凭票可以买条七块多个线毯，有正品，也有等外品。我毫勿犹豫个选择了等外品。讲起来是等外品，其实就是有几个地方红颜色个线条印歪脱了，搿能介就便宜了一块多洋钿。农场个寝室住六个人，侪是一样个线毯，晒勒外头分也分勿清爽，只有我个线毯，一眼就可以认出来个。
伊歇辰光，大家收入侪勿高，等外品既便宜，又可以勿收或者少收票证，物事也勿影响使用，真叫是实惠呀！就是现在勒迭个物资高度发达个辰光，搿能介个市场还是存在个，充分利用迭眼物资，应该也是个环保个行为呀。
讲述者：周月英原标题：《爱淘“等外品”的日子》